Lajmet   Përurohet objekti i Shkollës së Mesme Profesionale

Përurohet objekti i Shkollës së Mesme Profesionale - 09 nëntor 2010

Skenderaj, 9 nëntor – Ndonëse jo e përfunduar në tërësi, Shkolla e Mesme Profesionale, e njohur si Qendra Kompetente e Ndërtimtarisë në Skenderaj, një investim prej 4 milionësh të Qeverisë së Norvegjisë, është përuruar të martën me një ceremoni në të cilën kanë marrë pjesë zyrtarë të lartë të shtetit norvegjez, ministri i Arsimit Enver Hoxhaj...
Skenderaj, 9 nëntor – Ndonëse jo e përfunduar në tërësi, Shkolla e Mesme Profesionale, e njohur si Qendra Kompetente e Ndërtimtarisë në Skenderaj, një investim prej 4 milionësh të Qeverisë së Norvegjisë, është përuruar të martën me një ceremoni në të cilën kanë marrë pjesë zyrtarë të lartë të shtetit norvegjez, ministri i Arsimit Enver Hoxhaj, ish-deputetë e Skenderajt në Parlamentin e Kosovës, përfaqësues të pushtetit lokal të Skenderajt, nxënës, mësimdhënës, qytetarë dhe të ftuar të tjerë. Ambasadori norvegjez në Republikën e Kosovës, Sëerre Johan Kvale, ka thënë se është arritur stadi ku shkolla është e gatshme për t'i pranuar nxënësit e parë, por kjo nuk do të thotë se ajo është e përfunduar ose e pajisur plotësisht. “Puna do të vazhdojë edhe në muajt e ardhshëm, mirëpo unë ju premtoj se do të takohemi këtu serish në pranverë, kur shkolla do të jetë e kompletuar si brenda ashtu edhe jashtë”, ka thënë ambasadori Kvale para të pranishmëve. Sipas tij, kjo shkollë është e veçantë, pasi është shkolla e parë e këtij lloji jo vetëm në Kosovë por në gjithë rajonin. Kjo shkollë do të ofrojë mundësi të mira pune për mësimdhënësit dhe do t'u mundësojë nxënësve të marrin aftësi të reja që janë të nevojshme, jo vetëm në shtetin e Kosovës, por edhe në Evropë, ka shtuar ai, duke theksuar se nxënësit që dalin nga kjo shkollë, do të kenë diploma, të cilat do të mundësojnë punësim në Kosovë dhe në shtetet e Bashkimit Evropian. Kvala ka falënderuar projekt-menaxherin Argjend Karaj nga kompania IMG, Komunën e Skenderajt, e cila i ka mundësuar shkollës një rrugë të mirë, ndërsa edhe rryma do të jetë instaluar shumë shpejt. “Dua t'i them disa fjalë edhe për mësimdhënësit e shkollës, të cilët kanë ndjekur trajnimet e nevojshme për këtë shkollë: nëse kjo shkollë do të jetë një sukses arsimor, apo do të mbetet vetëm monument i arkitekturës moderne, varët nga ju”, ka thënë ambasadori i Norvegjisë në Prishtinë, duke falënderuar edhe ministrin Hoxhaj për vizionin e tij për sistemin arsimor modern në shtetin e Kosovës. Ai iu drejtua ministrit duke i thënë se ka pasur kurajën të shikojë të ardhmen për një jetë më të mirë për njerëzit e këtij vendi.  
Ministri i Arsimit, Enver Hoxhaj, ka thënë se kjo shkollë është dhurata më e mirë që një shtet mik i bën një vendi mik, siç është Kosova. “Kur e hapëm këtë shkollë në Skenderaj, tregon se sa rrugë të gjatë është dashtë të kalohet për të ardhur deri këtu ku jemi, se sa shumë gjak, lot dhe djersë është derdhur. Pa mbështetjen e miqve tanë, nuk do të ishte kjo shkollë, e as shteti i Kosovës. Pa miqtë tanë, një pjesë e madhe e jona ka mundur të jetë refugjatë në ndonjë vend të rajonit, e të tjerët në male duke vazhduar luftën për liri. Mirëpo kjo shkollë që ndërtohet në një qytet që është simbol i çlirimit, ky qytet sot me këtë shkollë do të jetë simbol i edukimit në Kosovë. Kjo shkollë synon ta ndryshojë misionin e arsimit në vendin tonë”, ka thënë Hoxhaj. Ministri i Arsimit në Kosovë, ka shtuar se shkolla në fjalë është lidhja më e mirë e të rinjve të Skenderajt dhe të Kosovë në përgjithësi me tregun e punës. Këtë investim të Qeverisë së Norvegjisë në Skenderaj, ministri e quajti më të mirin që ka ndodhur në Kosovë në dhjetë vjetët e fundit. “Të nderuar të pranishëm, sot e kësaj dite mbajeni kokën lart për këtë shkollë më moderne në Ballkan, dhe sot e kësaj dite shihni këtë shkollë si institucionin më të fuqishëm të shpresës, të besimit dhe të optimizmit të Republikës së Kosovës”, ka thënë ministri Hoxhaj. Në emër të Komunës së Skenderajt, foli kryetari Sami Lushtaku, i cili falënderoi ambasadorin Kvale dhe qeverinë e shtetit të tij për këtë investim të madh. Ai tha se kjo shkollë është shumë domethënëse dhe e rëndësishme. “Kam një kërkesë për drejtorin e kësaj shkolle, profesorët dhe nxënësit, që ta ruajnë këtë shkollë, të mësojnë, dhe dëshiroj që nga kjo shkollë të dalin kuadro që t'i shërbejnë vetvetes, dhe jo vetëm qytetarëve të Skenderajt, por gjithë vendit”, ka thënë Lushtaku, duke shtuar se në Qendrën Kompetente të Ndërtimtarisë do të kenë mundësi dhe rast të mësojnë nxënësit e të gjitha viseve të Kosovës. Ai i dhuroi ambasadorit Kvale një medalje me stemën e Komunës së Skenderajt në shenj falënderimi për ndërtimin e shkollës.  
Drejtori i Drejtorisë për Arsim në Skenderaj, Jashar Lushtaku, ka thënë se jo të gjitha punët kanë përfunduar në Qendrën Kompetente të Ndërtimtarisë (QKN). Siç tha ai, kanë përfunduar ato punë që mundësojnë zhvillimin e procesit mësimor në aspektin teorik me nxënës. Sipas tij, numri i nxënësve është i kënaqshëm, pasi deri më tani janë regjistruar 230 nxënës, që për vitin e parë është numër i konsiderueshëm. “Interesimi ka qenë i mirë si në nivel komunal po ashtu edhe nga vendet tjera të rajonit, ndërkaq personeli arsimor përbëhet nga 30 vetë”, ka thënë Lushtaku, duke shtuar se infrastruktura përcjellëse është në përfundim e sipër. I pyetur se nëse objekti është i gatshëm që tani për nxënësit e gjeneratës së parë, drejtori tha: “Do të shohim me grupin koordinues nga Norvegjia dhe MASHT-i se a do të mund të fillojë sot mësimi teorik në klasat të cilat janë të përgatitura, por për shkak të sigurisë së nxënësve, pasi punët janë duke u zhvilluar jashtë objektit, mund të presim për një ditë tjerë të afërt”. Qendra Kompetente e Ndërtimtarisë është e para e llojit të vet, jo vetëm në Kosovë, por edhe në Rajonin e Ballkanit. Për ndërtimin e saj, Qeveria e Norvegjisë ka ndarë afro 4 milion euro. 
 

RSS

Sign in