Lajmet   Përfaqësuesit e USAID-it: Komuna e Vushtrrisë është partner yni shumë i rëndësishëm

Përfaqësuesit e USAID-it: Komuna e Vushtrrisë është partner yni shumë i rëndësishëm - 11 janar 2018

 Drejtues të USAID-it, Programit për Komuna Transparente, Efektive dhe Llogaridhënëse (TEAM), program ky i vlerësuar si më i rëndësishmi që është duke e zhvilluar aktualisht në Kosovë nga USAID-i me mbështetjen e Ambasadës së SHBA-ve në Prishtinë, janë pritur  sot nga kryetari i Vushtrrisë, z. Xhafer Tahiri dhe drejtues tjerë të Komunës së Vushtrrisë.

Menaxheri i projekteve në USAID, z. Jeton Cana, tha se me drejtuesit e rinj të Komunës së Vushtrrisë pret bashkëpunim të ngushtë në zbatimin e këtij projekti 5 vjeçar që është duke u zhvilluar në vetëm pesë komuna të Kosovës, që pritet të jenë model jo vetëm për komunat tjera por edhe për qeverinë qendrore, në fushën e transparencës dhe llogaridhënies në menaxhimin e parasë publike.

z. Cana tha se Vushtrria nuk është përzgjedhur rastësisht në mesin e 5 komunave, në konkurrencë edhe me komuna të mëdha, pasi ka arritur rezultate të mira në transparencë, ka shprehur vullnet politik në përmbushjen e objektivave të përbashkëta, dhe  është partner i rëndësishëm i USAID-it

Edhe drejtori i programit TEAM, z. Stephen Carpenter tha se transparenca e plotë dhe llogaridhënia në menaxhimin e parasë publike, konkretisht në prokurim është objektivi kryesor i këtij projekti.

Nga ana tjetër, duke falënderuar USAID-in për gjithë mbështetjen e deritanishme që i kanë Komunës së Vushtrrisë, kryetari Xhafer Tahiri është zotuar për bashkëpunim të ngushtë por edhe përkushtim të administratës komunale në përmbushjen e këtyre objektivave që janë parakusht themelor për zhvillimin e përgjithshëm të Vushtrrisë.

Nga ky takim kryetari Tahiri përmes Përfaqësuesve të USAID i ka bërë ftesë si Ambasadorit të SHBA-së por edhe drejtorit të USAID-it që ta vizitojnë qytetin e Vushtrrisë.

Kryesuesi i Kuvendit Komunal, Nasuf Aliu, tha se do të vazhdoj rritja e transparencës të punës së Kuvendin Komunal. Ndërsa nënkryetari i komunës, Besim Muzaqi, tha se kjo mbështetje e USAID-it po përkon edhe me zotimet e administratës komunale për transparencë dhe llogaridhënie para qytetarëve.  


RSSShpërndaje në Facebook

Sign in