Në këtë manifestim morën pjesë: Kryesuesi i Kuvendit Komunal, z.Fadil Gashi, drejtori i Arsimit, z. Qemajl Sejdija, drejtori i shkollës, z.Blerim Kelmendi, mixha Halil Krasniqi, babai i heroit “Mujë Krasniqi”, përfaqësues të KFOR-it, përfaqësues të Policisë së Kosovës, përfaqësues të Qendrës Kryesore të Mjekësisë Familjare “Nënë Tereza”, familjarë të Ismet Rracit, mësimdhënës, drejtorë të shkollave të Klinës, prindër si dhe nxënësit e kësaj shkolle.

Kryesuesi i Kuvendit Komunal, z.Fadil Gashi, në fjalën e tij drejtuar të pranishmëve tha: “Sot, kam nderin që në emër të kryetarit të komunës, Prof. Dr. Zenun Elezaj, të ju përcjellë urimet më të sinqerta për ditën e shkollës. Kjo festë na krijon nder, emocione të veçanta sepse ky institucion mban një emër të madh të veprimtarit të përkushtuar për çështjen kombëtare dhe arsimore.

Të ndjehemi gjithmonë kështu krenarë dhe ju uroj suksese dhe mbarësi në rrugën tuaj të dijes!”- ka thënë kryesuesi Gashi.

Pas fjalës së kryesuesit, me një fjalë përshëndetëse para të pranishmëve doli edhe drejtori i shkollës, z.Blerim Kelmendi, si dhe anëtari i familjes së Ismet Rracit, Isni Rraci.

Ndërsa, një histori të shkurtër të jetës dhe veprës së Ismet Rracit e shpalosi profesori i Historisë së kësaj shkolle, Ali Raci: “Ismet Galan Rraci lindi më 18.09.1948 në fshatin Siqevë të Komunës së Klinës, në një familje bujare dhe tradicionalisht të përkushtuar për çështjen kombëtare. Shkollën fillore e kreu në Ujmirë në vitin 1963, të mesmen – normalen në Gjakovë, më 1969, ndërkaq, derisa ushtronte profesionin e mësuesit në Ujmirë dhe Gllarevë, pa shkëputje nga puna, kreu shkollën e lartë pedagogjike – Dega Gjuhë dhe Letërsi Shqipe – në Prishtinë. Nga viti 1974 punoi si arsimtar në shkollën fillore” Motrat Qiriazi” në Klinë, tani e emëruar me emrin “Ismet Rraci”, kurse në vitin 1978 zgjidhet drejtor në këtë shkollë, punë të cilën e kishte kryer me sukses deri në vitin 1983, kur për shkak të të ashtuquajturës “papërshtatshmëri moralo-politike” e me urdhër të ish-pushtetit të asaj kohe i ndërprehet detyra e drejtorit të shkollës. Ndërkohë, Ismet Rraci prapë e vazhdoi punën si mësimdhënës me ditar në dorë me një përkushtim edhe më të madh në arsimimin dhe edukimin e gjeneratave të reja duke i frymëzuar ato me ide patriotike dhe kombëtare. Pas luftës, kur në Kosovë po hidheshin themelet e një shteti të ri e plot shpresë, duke ditur virtytet e larta intelektuale e kombëtare të Ismet Rracit, populli i Klinës ia besoi mandatin e kryetarit të Komunës. Por, vetëm pak ditë pasi kishte marrë përsipër këtë detyrë, një dorë e zezë ia ndali hovin nga një pritë, duke ia marrë jetën teksa ishte duke shkuar në punë. Ismet Rraci ka shërbyer dhe do të shërbejë si udhërrëfim për jetësimin e idealeve tona kombëtare në arsimimin dhe edukimin e gjeneratave të reja brez pas brezi. Për veprimtarinë dhe kontributin e tij ai u nderua për së gjalli nga Presidenti i Republikës së Kosovës, Dr. Ibrahim Rugova. Ndërsa, pas vdekjes është nderuar nga Presidenca e Republikës së Shqipërisë dhe nga Presidenca e Republikës së Kosovës, si dhe nga Kuvendi i Komunës së Klinës u nderua me titullin “Nderi i Qytetit” dhe së fundmi Presidentja e Kosovës e nderoi me urdhrin “Hero i Kosovës”.

Kjo shkollë për momentin ka një staf të përbërë prej afro 70 mësimdhënësve dhe aty ndjekin mësimin rreth 1400 nxënës.