Republika e Kosoves

Malishevë

Përkujtohet 29 vjetori i masakrës së Malishevës

2019/01/30 - 12:22

Malishevë, 30 janar

Me rastin e 29 vjetorit të masakrës së Malishevës, sot janë bërë homazhe në vendin e rënies, përkatësisht në pllakën e ngritur për dy të vrarët, Ali Kryeziu dhe Hysni Mazreku, si dhe janë bërë homazhe në varrezat e tyre në Malishevë dhe Bubavec. Homazhe kanë bërë Kryetari i Komunës së Malishevës, Ragip Begaj, i shoqëruar nga kabineti qeveritar komunal, kryesuesi i KK të Malishevës, Rrahim Morina, i shoqëruar edhe nga anëtar të kuvendit, ish drejtuesit e komunës në vitin 1990.

Më 30 janar të vitit 1990, një ditë pas protestës së madhe në Malishevë, forcat policore kanë shtënë mbi popullatën e Malishevës, ku janë vrarë Ali Kryeziu dhe Hysni Mazreku, ndërsa janë plagosur dhjetëra të tjerë në Malishevë dhe në katër drejtimet, në hyrje dhe dalje të Malishevës.

Ngjarja e 30 janarit të vitit 1990, është një prej ngjarjeve që shënon edhe kthesë të madhe në institucionet e asaj kohe, pasi për herë të parë është bërë një reagim dhe kundërshtim nga ana e institucioneve, lidhur me vrasjen e qytetarëve të pafajshëm nga regjimi.

Krahas reagimit nga niveli komunal, është reaguar ashpër edhe në Kuvendin e Krahinës Autonome të Kosovës, nga përfaqësuesit e Komunës së Malishevës, e që më vonë, është bërë edhe suprimimi i statutit të Komunës së Malishevës dhe fshatrat e Malishevës, janë shpërndarë në katër komuna.

Po ashtu, kjo ngjarje, krahas reagimit institucional, kishte bërë jehonë edhe në arenën ndërkombëtare, dhe të gjitha televizionet dhe agjencitë e lajmeve në tërë botën, kishin njoftuar për këtë ngjarje dhe për reagimin e institucionit të Komunës së Malishevës.