Republika e Kosoves

Obiliq

Mbahet Manifestimi Qendror në Shtëpinë e Kulturës “Xhavit Haziri”

2024/06/14 - 9:53

Dita e Çlirimit u përmbyll me Manifestimin Qendror në Shtëpinë e Kulturës “Xhavit Haziri”, nën prezencën e Kryetarit të Komunës së Obiliqit, Xhafer Gashi, Kryesueses së Kuvendit Komunal, asambleistëve, ekzekutivit, përfaqësuesve të SHDL-së, familjarëve të dëshmorëve dhe martirëve, përfaqësuesve të KBI-së, qytetarëve dhe përfaqësuesve të institucioneve lokale.
Kryetari Gashi, në fjalën e tij para të pranishmëve, theksoi: “Në këtë ditë të shenjtë, përkulemi dhe nderojmë sakrificën deri në vetëflijim të dëshmorëve dhe martirëve të lirisë, kujtojmë dhe respektojmë kontributin e shumë lëvizjeve ilegale, lëvizjeve studentore, idealistëve që ia përkushtuan jetën çështjes së atdheut, veprimtarinë e shquar dhe punën e parreshtur të Presidentit Historik Dr. Ibrahim Rugova, heroizmin e pashoq të familjes Jashari në krye me Komandantin Legjendar Adem Jashari”. Ndër të tjera, ai u shpreh: ”Kur Obiliqi po shënon 25 vjetorin e çlirimit, jam i lumtur që bashkërisht kemi realizuar projekte madhore për qytetarët e Obiliqit. Sot, Obiliqi renditet ndër komunat e para me performancë të mirë komunale, për transparencë dhe llogaridhënie. Obiliqi sot ka hapësira të përshtatshme për të gjitha grupmoshat për realizimin e aktiviteteve të shumta. Obiliqi sot ka një arsimim më cilësor, aktivitete të shumta kulturore, sportive e rinore, shërbime më të mira shëndetësore, infrastrukturë të zhvilluar rrugore dhe nëntokësore. Obiliqi është qytet i sportit dhe i kampionëve. Në tërë territorin e komunës tonë, dëgjohen zhurmat e punimeve të makinerive, për çka ju kërkoj mirëkuptim, por në Obiliq po jetësohet projekti madhor i sistemit të ngrohjes qendrore – koogjenerimit. Obiliqi po zvogëlon ndotjen e mjedisit dhe po e mbron atë.”
Manifestimi vazhdoi nën përkujdesjen e DKRS-së, duke u përcjellë me poezi nga Teatri i Qytetit, me këngën “Ai është i Gjallë” nga artistja e re Alena Xhota, këngë patriotike nga artisti Vesad Mjeku, si dhe me pika artistike nga Ansambli i Këngëve dhe Valleve “AKV Qyteti i Obiliqit”.
Bashkëqytetarë të dashur, gëzuar Ditën e Çlirimit!