2019/10/16 - 10:24
Kryetari i Komunës së Podujevës, Agim Veliu, ka vizituar fshatin Metehi ku është duke u realizuar projekti i ndërtimit të pendave akumuluese të ujit, për ujitjen e tokave bujqësore.
Gjatë vizitës në Metehi, kryetari i Komunës, Agim Veliu, bashkë me nënkryetarin Nexhmi Rudari dhe drejtorin e Bujqësisë, Vezir Januzi, kanë përcjellë nga afër zhvillimin e punimeve në ndërtimin e njërës prej dy pendave në rrjedhën e lumit Llap.
Me këtë rast kryetari Veliu tha se gjatë këtij viti do të ndërtohen pesë penda akumuluese, të cilat do të shërbejnë për ujitjen e tokave bujqësore.
“Me këtë projekt, i cili është i rëndësisë së veçantë për fermerët llapjanë, do të vazhdojmë edhe viteve tjera, varësisht prej nevojave për ujitje të tokave bujqësore”, tha kryetari Veliu.
Me projektin që është duke u realizuar për këtë vit, tri penda do të ndërtohen në fshatin Metehi, kurse dy të tjera në Dobërdol.
