Republika e Kosoves

Prizren

Komuna e Prizrenit për katër vite pranë 600 familjeve për rregullimin e kushteve të banimit! 🏡

2021/04/02 - 3:58

𝙉𝙙𝙚̈𝙧𝙩𝙞𝙢𝙞 𝙞 𝙨𝙝𝙩𝙚̈𝙥𝙞𝙫𝙚 (𝙋𝙞𝙠𝙖 𝙅𝙖𝙨𝙝𝙩𝙚̈): 𝟭𝟭𝟬

Kryetari i Komunës së Prizrenit, Mytaher Haskuka dhe drejtori i Drejtorisë së Punës dhe Mirëqenies Sociale, Islam Thaqi sot kanë vizituar familjet përfituese të projektit “Ndërtimi i 30 shtëpive të formës – Pika Jashtë 2020”.

Me këtë rast kryetari Haskuka deklaroi se “Këtë projekt kemi filluar për herë të parë në vitin 2018, ku para mandatit tonë, familjeve iu janë dhënë vetëm materialet ndërtimore, të cilët në shumë raste nuk kanë arritur që t’i ndërtojnë këto shtëpi.

Duke e parë këtë gjendje, kemi rritur mbështetjen dhe në vend se të japim materiale ndërtimore kemi vendosur që t’ua ndërtojmë shtëpitë në hapësirë prej rreth 80m2, për familje në lagje dhe fshatra të ndryshme, që jetojnë në kushte të vështira të banimit.

Në 3 vitet e para kemi ndërtuar 80 shtëpi nga ky projekt, ndërkaq edhe sivjet do të fillojmë ndërtimin e 30 shtëpive të tjera, pas përfundimit të procedurave vlerësuese të thirrjes publike”.

 

𝙉𝙙𝙚̈𝙧𝙩𝙞𝙢𝙞 𝙞 𝙨𝙝𝙩𝙚̈𝙥𝙞𝙫𝙚 (𝙈𝙚 𝘾̧𝙚𝙡𝙚̈𝙨𝙖 𝙣𝙚̈ 𝙙𝙤𝙧𝙚̈): 𝟳𝟬

Përveç kësaj, Komuna e Prizrenit për herë të parë ka lidhur edhe marrëveshje me shoqatën “Jetimat e Ballkanit” për ndërtimin e 50 shtëpive në formën “Çelësa në dorë”, ndërkaq me këtë projekt sivjet do përfitojnë edhe 20 familje të tjera në nevojë.

Pra me gjithë këto projekte, gjatë 4 viteve të mandatit të kryetarit Haskuka, Komuna e Prizrenit do të ndërtojë së paku 180 shtëpi.

𝙈𝙚𝙧𝙚𝙢𝙚𝙩𝙞𝙢𝙞 𝙞 𝙨𝙝𝙩𝙚̈𝙥𝙞𝙫𝙚 𝙙𝙝𝙚 𝙞 𝙠𝙪𝙡𝙢𝙚𝙫𝙚: 𝟮𝟳𝟲

Kryetari Haskuka me këtë rast njoftoi se këto nuk janë të vetmet projekte që janë realizuar për përmirësimin e kushteve të banimit për familjet në nevojë. Me dy projekte të tjera të DPMS-së, ato të renovimit të shtëpive dhe meremetimit të kulmeve janë rregulluar dyert, dritaret, sanitaritë dhe kulmet e 196 shtëpive, ndërkaq sivjet do të vazhdojnë punimet edhe për rreth 80 shtëpi të familjeve që kanë probleme të banimit.

𝙈𝙖𝙩𝙚𝙧𝙞𝙖𝙡 𝙣𝙙𝙚̈𝙧𝙩𝙞𝙢𝙤𝙧 𝙣𝙜𝙖 𝙕𝙆𝙆: 𝟭𝟯𝟰

Përveç tyre edhe nëpërmjet Zyrës për Komunitete dhe Kthim, Komuna e Prizrenit ka ndarë materiale ndërtimore për 94 familje të komuniteteve, ndërkaq sivjet edhe rreth 40 familje të tjera do të jenë përfituese nga ky projekt.

Së fundi kryetari Haskuka vuri në dukje se Komuna e Prizrenit, si asnjëherë më parë, është pranë qytetarëve që kanë nevojë!