Kryetari i Komunës së Vushtrrisë, Ferit Idrizi, ka bërë të ditur se sot ka nënshkruar marrëveshje bashkëfinancimi me kompaninë SPEEEX Education, për aftësimin e të rinjve vushtrrias në fushën e zhvillimit softuerik.

Trajnimet do të organizohen në disa kategori, si:

Zhvillimi i aplikacioneve web

Zhvillimi i aplikacioneve mobile

Programimi (Front End, Back End, Java)

Bazat e të dhënave dhe administrimi i tyre

Arkitektura e softuerit dhe dizajnimi i sistemeve

Me rastin e nënshkrimit të marrëveshjes, kryetari Idrizi, tha se aftësimi profesional i të rinjve vushtrrias dhe lidhja e tyre me tregun e punës është prioritet.

“Ky trajnim ofrohet në dy module me nga tre muaj dhe mundëson përgatitjen e të rinjve për tregun global të punës, me njohuritë më të avancuara për zhvillimin e karrierës së tyre”, tha kryetari Idrizi.

Të gjithë të rinjtë vushtrrias që dëshirojnë të ndjekin këto trajnime, aplikimi do të mund të bëhet nga data 4 janar 2025, ndërkaq mund të vizitojnë zyrat e SPEEEX Education për informacione shtesë.