Kryetari i Komunës së Vushtrrisë, Ferit Idrizi, ka pritur sot në takim ambasadorin e Mbretërisë së Bashkuar, shkëlqesinë e tij, Jonathan Hargreaves.

Me këtë rast, kryetari Idrizi tha se ambasadorit i është prezantuar një pasqyrë e përgjithshme e qytetit të Vushtrrisë, si dhe mundësitë për investime dhe bashkëpunim me investitorë të jashtëm, në fushën e bujqësisë, turizëm urban dhe agroturizëm, industrinë e mobilierisë, të konstrukteve plastike e metalike, arsimin profesional. Po ashtu, Ambasadori është njoftuar edhe me projektet që janë duke u realizuar në komunën tonë.

Gjithashtu, bashkë kanë vizituar Kalanë e qytetit, si dhe punimet në sheshin e qytetit dhe parkingun nëntokësor.

“Bashkë vizituam Kalanë e qytetit, ku e njoftuam nga afër ambasadorin me historinë e lashtë të qytetit të Vushtrrisë, ndërsa vizituam edhe punimet në rikonstruimin e sheshit të qytetit dhe parkingun nëntokësor, një nga projektet më të rëndësishme për qytetin e që nga ambasadori morëm përgëzime për punën e bërë”, tha kryetari Idrizi.

Po ashtu, kanë vizituar kompaninë e suksesshme vushtrriase “Loni Dekor”, në të cilën aktualisht është duke u zhvilluar edhe mësimi dual nga nxënësit e shkollës së mesme teknike “Lutfi Musiqi”.

“Në anën tjetër, Ambasadori shprehi interesimin e tij për mundësitë e bashkëpunimit të kompanive britanike me ato vushtrriase të mobilierisë, si dhe mundësitë e investimeve direkte të kompanive britanike. Vizita u mbyll me një drekë të përbashkët me ushqime tradicionale në qebaptore të qytetit. Faleminderit për vizitën, ambasador!”, dekaroi kryetari Idrizi.