Është shënuar sot 1 shtatori, Dita e Dëshmorëve të Komunës së Vushtrrisë, ku u nderuan ata që janë më meritorët që sot Kosova gëzon lirinë.

Kryetari i Komunës së Vushtrrisë, Ferit Idrizi, bashkë me kabinetin qeveritar, përfaqësuesit e Shoqatave të dala nga lufta e UÇK-së, familjarë të dëshmorëve, invalidë, veteranë e oficer të lartë të UÇK-së, përfaqësues të institucioneve dhe qytetarë të shumtë kanë bërë homazhe dhe kanë vendosur kurora lulesh tek kompleksi memorial në Vushtrri dhe tek varrezat e dëshmorëve të kombit në Bletaj.

Po ashtu, për nderë të Ditës së Dëshmorëve të Vushtrrisë është mbajtur edhe akademi solemne, ku u vlerësua lartë sakrifica e të gjithë dëshmorëve të kombit.

“Lavdi të gjithë dëshmorëve të kombit, që fal gjakut të tyre Kosova gëzon lirinë e pavarësinë”, tha kryetari i Komunës Ferit Idrizi.

Manifestimi për Ditën e Dëshmorëve të Komunës së Vushtrrisë u përmbyll me një program kulturo-artistik nga Ansambli “Hasan Prishtina”.