Fjalë rasti me këtë rast ka prezantuar nënkryetari i komunës, z. Heset Loku. Z. Loku mes tjerash tha se në luftimet e 9 marsit të vitit1999, në Kotlinë ranë dy dëshmorë si dhe u djeg një pjesë e shtëpive të fshatit, ndërsa më 24 mars të vitit 1999, në mënyrën më çnjerëzore u vranë 26 kotlinas, prej tyre 11 dëshmorë dhe 15 martirë. Karvanit të dëshmorëve nga ky fshat iu shtua edhe një dëshmor i cili ra në luftimet në kufirin shqiptaro-shqiptar, në Koshare.

z. Loku në vazhdim tha se fatkeqësisht, edhe sot pas 11 viteve kjo ngjarje nuk është ndriçuar në mënyrën si e meriton.

Dëshmorët dhe martirët janë ata që dhanë më të shtrenjtën për atdheun e kombin, e ne sot i kujtojmë ata, tha në mes tjerash në fjalën e tij z. Loku.

Me një fjalë, është prezantua edhe kryetari i të OVL-UÇK-së, z. Ejup Runjeva. Z. Runjeva tha se ishte lufta heroike e Ushtrisë Çlirimtare të Kosovës me komandantin legjendar Adem Jashari dhe shumë heronjve e dëshmorëve tjerë që me gjakun e tyre i vunë vulën përfundimtare çlirimit të Kosovës. Në këtë ditë, me siguri do të kujtohen lotët, gjaku dhe dhimbjet e shumta, por së bashku me ato dhembje duhet të shkëlqej edhe gëzimi dhe krenaria jonë për dëshmorët tanë që vulosën lirinë, shtetësinë dhe pavarësinë e Kosovës përfundoi z. Runjeva.

Në emër të familjeve të dëshmorëve, ka falënderuar të pranishmit për pjesëmarrje, z. Mustafë Loku, ndërkaq u shfaq edhe një dokumentar me inserte të xhiruara nga fshati Kotlinë si dhe inserte nga rivarrimi i dëshmorëve e martirëve të këtij fshati.