Në sallën e mbledhjeve të kuvendit, në objektin e administratës komunale, sot është mbajt  mbledhja e katërt për vitin 2010 e Kuvendit të Komunës, të cilën e ka udhëheq z. Xhelal Gashi, kryesues i kuvendit.

Në takimin e sotëm Kuvendi shqyrtoi dhe miratoi Raportin e Realizimit të mjeteve buxhetore për periudhën Janar – Mars 2010. Drejtori i Drejtorisë për Ekonomi Financa e Buxhet, z. Fikri Vërbani ka thënë se buxheti fillestar i aprovuar për vitin 2010 ishte në shumë prej 4,334,771 euro ndërsa buxheti aktual është në shumë prej 4,507,581 euro apo me i lartë se buxheti fillestar në shumë prej 172,870 euro ose në përqindje prej 4%. Rritja e buxhetit është bërë nga bartja e mjeteve të pashpenzuara prej vitit 2009 dhe atë nga të hyrat vetjake shuma prej 118,839 euro, pastaj nga participimet e mjeteve nga komuniteti në shumë prej 14,502 euro dhe donacionet e pashpenzuara në vlerë prej 8,009 euro, pastaj ngritja e pagave të punëtorëve shëndetësor, shuma prej 44,905 euro ndërkohë që është bërë një shkurtim i buxhetit në shumë prej 13,386 euro për financimin e përkohshëm të RTK-së.

Sipas Raportit shpenzimet janë realizuar në vlerë prej 820,954 euro ose 18.2 %  apo sipas programeve buxhetore, Administrata komunale ka shpenzuar 199,118 euro, Arsimi, 489,975 euro, dhe Shëndetësia, 131,861 euro që krahasuar me periudhën e njëjtë të vitit të kaluar shpenzimet janë rritur në shkallë 24,7 % apo 162,446 euro.

Gjatë tremujorit të parë të këtij viti, sipas raportit janë realizua 111,745 euro nga të hyrat vetanake kundrejt 549,341 euro të planifikuara për vitin 2010 apo plani vjetor është përmbushë në shkallë 20.3% ndërsa krahasuar me periudhën e njëjtë të vitit të kaluar këto të hyra janë më të larta për 5,846 ose 5,5 %.

Kuvendi në seancën e sotme themeloi Komisionin Komunal të Aksionarëve për KRM “Pastërtia” Njësia në Kaçanik, në përbërje: Heset Loku, i emëruar nga kryetari i komunës, Driton Thaqi (PDK) dhe Elife Murseli (LDD) të zgjedhur nga Kuvendi i Komunës dhe Komisionin Komunal të Aksionarëve për NKP “Lypeteni” në përbërje: Rushan Ceka, i emëruar nga kryetari i komunës, Diana Bajrami (PDK) dhe Ramadan Osmani (LDK). Anëtarët e kuvendit nga radhët e AAK-së dhe AKR-së shprehën mospajtimin e tyre lidhur me përfaqësimin e partive të tyre në këto komisione duke kërkuar që të përfaqësohen në të dy komisionet, në njërin më një anëtarë të AAK-së e në tjetrin të AKR-së dhe meqenëse nuk kaloi propozimi i tyre, ata lëshuan mbledhjen dhe u deklaruan se tërhiqen edhe nga pjesëmarrja me një anëtarë nga radhët e AAK-së në Komisionin Komunal të Aksionarëve për KRM “Pastërtia”, SHA, Njësia në Kaçanik.