Në manifestimin qendror të mbajtur në Biqec, Kryetari i Komunës së Kaçanikut Besim Ilazi në fjalën e tij, tha se jemi mbledhur sërish sot në një përvjetor dhembje por edhe krenarie për të kujtuar dëshmorët, të cilët dhanë jetën e tyre për lirinë e vendit. “25 maji i vitit 1999 ishte një ditë e gjatë me tym e flakë, vuajtje e dhembje, por edhe krenare për lirinë e vendit tonë. Armiku duke parë se liria jonë ishte afër, kishte përdorur të gjitha makineritë për të shkatërruar çkado që i dilte përpara, duke mos kursyer as pleq, gra e fëmijë” tha mes tjerash Kryetari Ilazi, duke shtuar se sot padrejtësisht prirësit e UÇK-së po mbahen në Hagë. Në emër të OVL-së UÇK-së foli Azem Guri- Komandant i batalionit të dytë, ndërsa në emër të Këshillit Organizues foli Suhad Dullovi-Drejtor për Bujqësi, Zhvillim Rural dhe Pylltari. Në këtë manifestim u shfaq edhe një program i pasur kulturo artistik nga artistët kaçanikas, ndërsa performoi edhe këngëtari i estradës Mahmut Ferati.

Në emër të familjeve të dëshmorëve të pranishmit i përshëndeti dhe falenderoi për pjesëmarrje Imer Guri, djali i dëshmorit Sadik Guri.

Para se të fillojë manifestimi qendror, janë organizuar manifestime e janë bërë homazhe dhe janë vendosur lule pranë pllakës përkujtimore të dëshmorëve Shaqir Kuka e Sakip Hysa në lagjen Kukaj, pranë pllakës përkujtimore të dëshmorëve Avdulla Baftiu, Nazmi Osmani dhe Kemal Kolshi, në Lagjen Zharku, te pllaka përkujtimore e dëshmorëve Qemal Guri e Sadik Guri, në vendin e quajtur “Arat e Stanit” në Biçec, pastaj pranë lapidarit të dëshmorëve; Feriz, Xhevdet, Qemal e Sadik Guri si dhe te bustet e dëshmorëve: Fadil Bunjaku, Habit Dullovi e Fatmir Horuni, në Biçec, e më pas edhe te Kompleksi i Varrezave të Dëshmorëve. Poashtu në orët e mbrëmjes janë organizuar edhe dy turne memoriale “ Avdulla Baftiu e Bashkim Vishi” si dhe “ Diki 2023” për nderë të dëshmorëve të rënë në këtë ditë.