Në kuadër të aktiviteteve të Nëntorit, sot në hollin e Komunës së Lipjanit, u hap ekspozita e fotografit të njohur, Arian Mavriqi. Ekspozita përmban një koleksion të veçantë fotografish artistike, që paraqesin me mjeshtëri pasurinë e faunës së Kosovës, duke nxjerrë në pah larminë e kafshëve të egra.
Në këtë aktivitet mori pjesë Nënkryetari i Komunës së Lipjanit, z. Diamant Bytyqi, së bashku me bashkëpunëtorët e tij. Ata ndoqën nga afër ceremoninë e hapjes dhe prezantimin e mbajtur nga vetë fotografi, z. Mavriqi, i cili ndau detaje rreth procesit krijues dhe theksoi rëndësinë e fotografive të tij për ndërgjegjësimin mbi ruajtjen e faunës dhe mjedisit.
