2025/01/29 - 2:49
Në objektin e Komunës së Graçanicës u mbajt mbledhja e parë e rregullt e Kuvendit të Komunës së Graçanicës, ku u miratuan raportet e punës së komiteteve komunale, si dhe propozimet tjera.
Mbledhjen e udhëhoqi kryesuesi i Kuvendit të komunës, Millan Dimitrijeviq, i cili së pari i njoftoi asamblistët me rendin e paraparë, të përcaktuar më parë për mbledhjen e parë të rregullt të Komitetit për Politikë dhe Financa. Më pas u miratua procesverbali i mbledhjes së nëntë të rregullt të mbajtur në fund të vitit 2024.
Raporti i punës së Këshillit për Siguri në Bashkësi u miratua me propozimin e kryetares së komunës, Ljiljana Shubariq. Asamblistët vlerësuan se viti i kaluar ishte shumë sfidues në aspektin e sigurisë dhe në këtë drejtim u bënë thirrje të gjitha organeve të sigurisë që ta trajtojnë këtë çështje më seriozisht. Me propozim të kryetares Shubariq, u miratua Plani i punës së Këshillit Komunal për Siguri për vitin 2025.
Asamblistët kishin vërejtje veçanërisht për incidentin e 28 nëntorit 2024, kur një grup shqiptarësh në një kolonë makinash brohoritën dhe provokuan vendasit në qendër të Graçanicës. Ata theksuan se kishte mungesë të përgjigjes adekuate nga policia dhe agjencitë e tjera të sigurisë me këtë rast.
Asamblistët miratuan edhe propozimin e vendimit për ndryshimet e miratuara në personel dhe shumën përkatëse buxhetore për kategorinë “Paga dhe shtesa në paga”, që në fakt i referohej ndërmarrjes së veprimeve të nevojshme për shpalljen e konkursit për pozitat e munguara në Qendrën për Punë Sociale në Llapllasellë.
U miratua edhe Raporti vjetor i punës së Komitetit për Shërbime Publike për vitin 2024, ku asamblistët kërkuan përgjegjësi më të madhe, siç thanë ata, për problemet e shumta infrastrukturore, siç janë mungesa e sinjalistikës në komunikacion, gropat, qentë endacakë e të ngjashme. Ata kërkuan që në mbledhjen e radhës të marrin pjesë drejtorët e drejtorive përkatëse për t’i informuar se çfarë do të bëhet për këtë çështje në vitin 2025.
Problemet e lartpërmendura janë trajtuar edhe në Raportin e punës së Komitetit për Komunitete për vitin 2024, të paraqitur nga kryesuesi Aziz Karadollami.
