Në konferencën e dytë morën pjesë Kryetari i Komunës z. Bashkim Ramosaj, përfaqësues nga Ministritë për Zhvillim Rajonal, Ministria e Industrisë, Ndërmarrësisë dhe Tregtisë, Komuna e Pejës, Gjakovës, Deçanit, Junikut, Istogut, Klinës, Rahovecit, bizneset dhe akademia, ku u zhvillua konferenca e dytë e FERD-it me temën “Perspektivat dhe Strategjitë për Bashkëpunim dhe Zhvillim të Qëndrueshëm Rajonal në Epokën e Digjitalizimit”.

Të pranishmit u përshëndetën nga nikoqiri i konferencës, Kryetari i Komunës së Deçanit, z. Bashkim Ramosaj, i cili theksoi rëndësinë e bashkëpunimit për zhvillimin e qëndrueshëm të rajonit.

Rektori i Universitetit “Haxhi Zeka”, Prof. Dr. Armand Krasniqi, nënvizoi rolin e universitetit në përgatitjen e kuadrove të rinj, të përgatitur për tregun e punës dhe mbështetjen e institucionit që përfaqëson në përkrahje të misionit të tretë të institucioneve të arsimit të lartë, që është kontributi në shoqëri.

Zv. Ministri i Ministrisë për Zhvillim Rajonal, z. Ali Tafarshiku, vlerësoi rëndësinë e projekteve të përbashkëta për përparimin ekonomik, ndërsa zv. Ministri i Ministrisë së Industrisë, Ndërmarrësisë dhe Tregtisë, z. Resul Makreshi, theksoi rolin kyç të politikave inovative për nxitjen e sipërmarrjeve dhe rritjen e konkurrencës në nivel lokal dhe rajonal.

Në këtë konferencë u diskutuan tema kyçe për zhvillimin e qëndrueshëm rajonal në epokën e digjitalizimit. Nga sesionet e mbajtura në Qendrën Rinore të Deçanit, dolën përfundime dhe rekomandime të rëndësishme për të ardhmen e Dukagjinit.

Sesioni i parë u përqendrua në ndërkombëtarizimin dhe përfshirjen digjitale, duke nxjerrë në pah rëndësinë e inovacionit për ekonominë lokale. Prezantimet nga z. Kesra Nermend, z. Tahir Shabani dhe znj. Fjolla Restelica Ahmeti sollën ide konkrete për kërkim, zhvillim dhe bashkëpunim.

Sesioni i dytë trajtoi përmirësimin e strategjive lokale, ku drejtorët e komunave për zhvillim ekonomik ndanë përvojat dhe mundësitë e reja për bashkëpunim. Drejtori për Zhvillim Ekonomik i Komunës së Deçanit, z. Isuf Demhasaj theksoi rolin që ka universiteti dhe bizneset në zhvillimin e qëndrueshëm ekonomik rajonal.

Sesioni i tretë u përqendrua në rolin e komunave dhe universitetit për nxitjen e inovacionit dhe forcimin e bizneseve lokale. Përfaqësues nga Birra Peja dhe Oda e Hotelerisë sollën një perspektivë të re mbi sfidat dhe mundësitë në epokën digjitale.

Objektivat për të ardhmen përfshijnë bashkëpunimin për hartimin e planeve strategjike, digjitalizimin e hartëzimit të bizneseve dhe projekte të reja për zhvillim të përbashkët, zgjerimin e FERD-it me komuna të tjera, si dhe ndërkombëtarizimi i tij.

Falënderojmë Universtitetin “Haxhi Zeka” dhe FERD për organizimin e kësaj konference dhe bashkëpunimin!