Komuna shënon ditën botërore të turizmit
2020/09/28 - 10:17
Me pjesëmarrjen e kryetarit të Komunës së Prizrenit, Mytaher Haskuka, Drejtoria e Turizmit dhe Zhvillimit Ekonomik ka mbajtur një takim me akterët e fushës së turizmit, ku drejtoresha e DTZHE-së, Sevil Liman Kazaz ka prezantuar raportin e punës së kësaj drejtorie për periudhën 2018-2020.
Turizmi, në programin tonë qeverisës është protagonist kryesor i zhvillimit të qëndrueshëm ekonomik, për të siguruar punësim, nxitje të ndërmarrjeve, më shumë të ardhura e më shumë mirëqenie për qytetarët e komunës sonë.
Andaj, në vazhdën e aktiviteteve që po realizojmë për nder të Ditës Botërore të Turizmitit, sot së bashku me drejtoreshën e Turizmit dhe Zhvillimit Ekonomik, Sevil Kazaz, kemi prezantuar projektet, investimet dhe aktivitetet që kemi realizuar gjatë tre viteve të fundit, si:
- Hartimi i strategjisë së turizmit, duke përmbushur 80% të kategorive të përshkruara në strategji
- Investim në vlerë prej 1,854,367 euro në Parkun e Biznesit, ku 40 hektarë janë gati për investime
- Pasurimi i ofertave turistike si Downhill, Shtegu për Çiklistë, Via-Ferrata, Pagllajdi, Kajaku, Auto-Kampi
- Mbështetja e 134 ndërmarrësve dhe OJQ-ve me subvencione dhe grante, në vlerë prej 141,045 euro
- Projekte të ndryshme për krijimin e destinacioneve të reja turistike si në Kabash-Korishë, Gorozhup, Jabllanicë
- Organizimi i ngjarjes “Invest in Prizren”, me pjesëmarrjen e 250 bizneseve nga diaspora dhe shtetet e ndryshme të botës
- Hartimi i rregulllores për subvencionimin e bizneseve të ndikuar nga pandemia
- Krijimi dhe mirëmbajtja e ueb-faqes së turizmit
- Trajnime profesionale për rreth 170 persona
- Hapja e Qendrës Artizanale, ku do të aftësohen 200 gra
- Organizimi i panaireve të ndryshme si ajo e veshjeve kombëtare, artizanaleve, ushqimeve tradicionale, tur operatorëve dhe mundësimi i pjesëmarrjes së hoteleve, agjencive turistike e tur-operatorëve në 5 panaire ndërkombëtare
- Organizimi i aktiviteteve “Vera Kulturore”, “Dimri Kulturor”, “Netët e Bardha”
- Hartimi i materialeve promovuese si: harta turistike, 7 arsyet për të vizituar Prizrenin, turi njëditor në Prizren, katalogu i hoteleve etj.
- Vendosja e 50 tabelave të ndryshme turistike
- Mirëmbajtja e rrugëve në Struzhë, Muzhlak, Jabllanicë, Shtëpi Malore dhe Pasha Çeshme.
- Vendosja e Qendrave të Informimit (InfoSick) për turistë në Prevallë dhe stacionin e autobusëve
- Punime në rregullimin dhe restaurimin e muzeve, si atë të Nënës Terezë, Muzeu i Dëshmorëve në Landovicë dhe Muzeu i Etnologjisë-Shehzades, si dhe shumë projekte që do të realizohen gjatë këtij viti.