2010/09/16 - 12:00
Dëshmoret e kombit ishin dhe do të mbetën përjetësisht nderi dhe krenaria jonë dhe gjithherë do të mundohemi qe me punë dhe realizim projektesh me interes për qytetaret e komunës sonë të festojmë këtë ditë.
Gjithsecili nga ne është i lumtur kur gjendet para një tempulli të diturisë e aq më i gëzuar në një vend kur për herë të parë në historinë e vet ndërtohet një shkollë e re. Ky sukses gjithsesi është i përbashkët për të gjithë, por është e një përgjigje ndaj atyre zërave që morën dje guxim dhe na akuzuan se premtimet tona do të mbesin vetëm premtime. Unë asnjëherë nuk kam marrë pjesë në fushata në Kojush, Mazrrek e as në Planejë e Guruzhup, por kam vu gurthemele e do t’i përurojë edhe shumë investime tjera.
Dita kur po e përurojmë këtë shkollë nuk është ditë e zakonshme, por është ditë simbolike që shënon ditën e Dëshmorëve të UÇK-së për Komunën tonë e si[ jam në dijeni, gjysma e këtyre dëshmorëve kanë kaluar nëpër këtë fshat qoftë si luftëtarë qoftë si bartës të zjarrit me të cilin zjarr luftuan dhe e çliruan Kosovën. Andaj, në këtë ditë të madhe me gëzim të madh kam kënaqësinë që t’ua uroj këtë shkollë të re me dëshirën që nga këto banka të dalin njerëz të ditur që do të dinë ta drejtojnë ardhmërinë e vendit.
Të dashur banorë të Kojushit dhe të Hasit në përgjithësi, ne e dimë se me këtë shkollë ua kemi kthyer buzëqeshjen fëmijëve tuaj, po sot këtë buzëqeshje do t’ua afrojmë edhe bashkëmoshatarëve tuaj në Nashec e shumë shpejtë edhe të shumë fëmijëve të komunës sonë.
Të investosh në arsim, do të thotë të investosh në ardhmërinë e sigurt. Andaj, investimi ynë në këtë shkollë në vlerë prej 167 mijë € është vetëm njëri prej investimeve , sepse në këtë fshat kemi investuar edhe në asfaltimin e rrugës e do të investojmë edhe në të ardhmen jo vetëm këtu por në çdo cep të komunës sonë.
Të nderuar të pranishëm, me këtë rast, duke iu uruar edhe një herë E GËZOFSHI shkollën e re, dua t’ju them se shumë shpejtë do të takohemi në përurimin e asfaltit Kojush – Goruzhup dhe asfaltimin e rrugës në Lagjen Shehu deri te Teqeja e Sheh Tahirit.
