Ramiz LLADROVCI

PËRGJEGJËSITË

KRYETARI I KOMUNËS
Neni  70
70.1. Kryetari i Komunës së Gllogocit zgjedhët në zgjedhjët e drejtpërdrejta në pajtim me Ligjin mbi Zgjedhjet Lokale me mandat  katërvjeçar.
70.2. Mandati i kryetarit të komunës përfundon;
a)kur ta kryejë mandatin,
b)nëse vdes,
c)nëse jep dorëheqje,
d)nëse ndërron vendbanimin në komunë tjetër,
e)nëse nuk paraqitet në punë për më shumë se një muaj pa arsye,
f)nëse shkarkohet nga detyra në pajtim me nenin 64 të Ligjin për Vetëqeverisje Lokale,
g)në rast të vendimit përfundimtar të gjyqit që e privon kryetarin e komunës nga cilësia juridike,
h)në rast të dënimit për vepër penale me vendim për gjashtë(6) muaj ose më tepër

Neni 71

71.1 .Me rastin e zgjedhjes Kryetari i Komunës bën betimin para anëtarëve të Kuvendit të Komunës. Përmbajtja e betimit është si vijon:
“Unë____________,betohem se do t’i kryej detyrat dhe do t’i ushtroj kompetencat e mia si Kryetar i Komunës së Gllogocit me nder, besnikëri, paanshmëri, me ndërgjegje dhe në pajtim me ligjin në mënyrë që të sigurohen kushtet për një jetë të qetë për të gjithë”.
71.2. Kryetari i komunës është udhëheqës i degës ekzekutive të komunës.

Neni 72

72.1.Kryetari i Komunës ushtron përgjegjësitë  e përcaktuara me nenin 58 të Ligjit për Vetëqeverisje Lokale:

a) përfaqëson komunën dhe vepron në emër të saj;
b) udhëheq ekzekutivin e komunës dhe administratën e komunës dhe mbikqyr administrimin financiar:
c) ushtron të gjitha kompetencat të cilat nuk i ipen në mënyrë eksplicite Kuvendit të Komunës apo komiteteve të tij;
d) ekzekuton aktet e Kuvendit të Komunës;
e) emëron dhe shkarkon Nenkryetarin e Komunës;
f) emëron dhe shkarkon Drejtorët e Drejtorateve  të Komunës;
g) organizon punën dhe drejton politikën e komunës;
h) propozon rregulloret dhe aktet të tjera për miratim në Kuvendin e Komunës;
i) propozon zhvillimin komunal,planet rregullative dhe investuese,propozon buxhetin vjetor për miratim në Kuvendin e Komunës dhe e ekzekuton buxhetin e miratuar;
j) raporton para Kuvendit të Komunës për situatën ekonomike,financiare të komunës dhe për zbatimin e planeve investuese të komunës së paku njëherë në gjashtë(6)muaj apo kurdoherë që kerkohet nga Kuvendi i Komunës;dhe
k) aktivitete tjera sipas Ligjit.

72.2. Përgjegjësitë tjera të Kryetarit të Komunës janë si në vijim:

a) I propozon Kuvendit të Komunës aktet, vendimet dhe dispozita të tjera ligjore për aprovim.
b) Mbikëqyr administrimin e përgjithshëm financiar të Komunës.
c) Mbikëqyr zbatimin e të gjitha akteve juridike të aprovuara nga Kuvendi i Komunës
e) Delegon përgjegjësi te anëtarët e Bordit të Drejtorëve dhe mbikëqyr zbatimin  e përgjegjësive të deleguara
f) I propozon Kuvendit të Komunës ndryshime në lidhje me funksionin dhe numrin e   Drejtorateve dhe funksionet e tyre në pajtim me legjislacionin në fuqi.
g)  Jep propozime Kuvendit të Komunës për konstituimin, organizimin dhe koordinimin e organeve komunale si dhe krijimin e institucioneve dhe ndërmarrjeve si dhe formon komisione të ndryshme sipas kërkesës së Bordit të Drejtorëve.
h) Bën caktimin apo ndarjen  dhe koordinimin e përkohshëm të punëve dhe përgjegjësive në mes të drejtorateve sipas nevojës, duke pasur për bazë lëmin apo projektin e caktuar.
i) Dhe përgjegjësi tjera të përcaktuara nga Kuvendi i Komunës.