Komiteti për Komunitete, organi obligativ i Kuvendit të Komunës në Malishevë, ka mbajtur mbledhjen e tij të njëmbëdhjetë të rregullt, nën drejtimin e kryesuesit Amrush Helshani. Gjatë kësaj mbledhjeje, anëtarët e komitetit diskutuan disa çështje të rëndësishme për komunitetet pakicë dhe për komunitetin në përgjithësi, duke u fokusuar kryesisht në problemet infrastrukturore që po hasin banorët në vendbanimet e tyre.

Anëtarët e komitetit paraqitën disa shqetësime dhe vërejtje lidhur me problemet teknike dhe infrastrukturore që po përjetojnë vendbanimet, ndërkohë që nuk u raportuan problematika të tjera të lidhura me çështje etnike.

Temë tjetër e kësaj mbledhje ishte edhe menaxhimi i mbeturinave dhe shërbimet tjera publike, shërbime për të cilat, anëtarët e komitetit thanë se janë të kënaqur me këto shërbime, sidomos me grumbullimin e mbeturinave.

Kryesuesi i komitetit, Amrush Helshani, i cili edhe drejton mbledhjet e komitetit, ka premtuar se do të angazhohet për adresimin e këtyre shqetësimeve dhe se do t’i paraqesë ato në organet përkatëse, me qëllim zgjidhjen e tyre sa më të shpejtë.