2010/08/14 - 12:00
I shoqëruar nga ministrat Bajram Rexhepi e Sadri Ferati, nga zëvendësministri Bedri Hamza dhe nga kryetari i komunës së Mitrovicës e bashkëpunëtorë të tjerë, Thaçi tha se gjendet në këtë lagje që të tregojë edhe njëherë zotimin për implementimin e projekteve të rëndësishme, për rikthimin e njerëzve në shtëpitë dhe pronat të tyre.
Mitrovicë, 14 gusht
Gjatë qëndrimit të tij, të shtunën, në lagjen veriore të qytetit, “Kroi i Vitakut”, ku tashmë janë kthyer për të jetuar 20 familje shqiptare, Kryeministri i Kosovës, Hashim Thaçi, ka thënë se progresi i arritur në kthimin e shqiptarëve të zhvendosur në pronat e tyre në veri të Mitrovicës, është jashtëzakonisht inkurajues.
I shoqëruar nga ministrat Bajram Rexhepi e Sadri Ferati, nga zëvendësministri Bedri Hamza dhe nga kryetari i komunës së Mitrovicës e bashkëpunëtorë të tjerë, Thaçi tha se gjendet në këtë lagje që të tregojë edhe njëherë zotimin për implementimin e projekteve të rëndësishme, për rikthimin e njerëzve në shtëpitë dhe pronat të tyre.
Ai tha se ka diskutua me kryetarin Kastrati për projektin për investime shtesë për rikthimin e familjeve tjera, që do të thotë se janë edhe 200 shtëpi që duhet të rindërtohen, në një projekt prej 5 milionë euro.
“Unë që në mbledhjen e ardhshme të Qeverisë së Republikës së Kosovës do të shtroj për diskutim këtë projekt, sepse ky është investim në një proces për integrimin e qytetit dhe në të njëjtën kohë edhe për integrimin dhe bashkëpunimin e të gjithë qytetarëve, për një jetë të re, për një Mitrovicë të re, Mitrovicë të bashkuar, unike. Do të vazhdojmë më tutje në kuptimin e ngadhënjimit të tolerancës ndëretnike, por edhe implementimin e plotë të dokumentit të presidentit Ahtisari, të strategjisë për integrim dhe për sundimin e ligjit dhe për organizimin e zgjedhjeve të lira në komunën e re, që do të formohet, ashtu sikur që do të bëjmë edhe për organizimin e zgjedhjeve të lira në tri komunat tjera. Do t’i realizojmë edhe angazhimet tjera investuese që do ta mbulojnë gjithë territorin e Republikës së Kosovës”, është shprehur Thaçi.
Në pyetjen e një gazetari, se si e komentoni faktin se përfaqësuesit e ICO-së dhe EULEX-it, kanë thënë se do të vazhdojë edhe një kohë mandati i tye, ndërsa ju keni thënë ditë më parë se është realizua 90 për qind e pakos së Ahtisarit dhe se do të përfundoj mandati i tyre, Kryeministri Thaçi pasi ka thënë se falënderon ICO-në dhe EULEX-in për mbështetjen e qëndrimit të tij se është përmbyllur një kapitull i rëndësishëm i angazhimeve tona në rreth 90 për qind të dokumentit të presidentit Ahtisari, ka shtuar se ka mbetur edhe pjesa tjetër të cilën duhet të vazhdojmë për ta implementuar bashkërisht me të gjitha autoritetet ndërkombëtare.
“Procesi i pavarësisë së mbikëqyrur për Republikën e Kosovës po përmbyllet suksesshëm. Opinioni i gjykatës ndërkombëtare për statusin e Kosovës ka sjellë qartësi të jashtëzakonshme dhe gjithçka është e qartë, andaj tani e tutje gjithçka do të vazhdohet në bazë të Kushtetutës dhe ligjeve të Republikës së Kosovës. Ne jemi duke bërë përgatitjet maksimale në këtë periudhë të rëndësishme për Asamblenë e OKB-së dhe dje së bashku me presidentin kemi dërguar dhe 190 letra, prej të cilave 69 letra falënderimi për njohjen e Kosovës, shteteve që e kanë njohur Republikën e Kosovës, si dhe letra të tjera apo kërkesa për njohjet e tjera që duhet të ndodhin për pavarësinë e Kosovës”, është përgjigjur tutje ai.
Në pyetjen se a do të diskutohet për statusin special të Mitrovicës, siç është përmendur në qarqe të caktuara, duke e krahasuar me statusin e Tirolit jugor, Kryeministri Thaçi ka ripërsëritur se dokumenti i presidentit Ahtisari, është i vetmi dokument që mund të realizohet.
“Do të vazhdohet të punohet për strategjinë e integrimit që është prezantuar më herët nga ana e Qeverisë së Kosovës dhe organizmat ndërkombëtarë. Në asnjë rrethanë nuk është diskutuar dhe as që është kërkuar që të diskutohet për një status të tillë dhe lirisht mund të ju them se është një spekulim medial të cilin duhet harruar shpejtë sepse nuk do të ndodhë në asnjë mënyrë. Ne jemi ata që vendosim për vendin tonë, ne jemi shtet i pavarur e sovran, jemi ata të cilët kemi përgjegjësi sepse jemi të zgjedhur nga qytetarët dhe ne do t’i marrim vendimet për të ardhmen tonë”, ka qenë i prerë Kryeministri Thaçi.
Ai ka thënë po ashtu se veriu i Mitrovicës do të integrohet ashtu sikur të gjitha pjesët tjera të Republikës së Kosovës, por që kërkohet vetëm rritje e përgjegjësive dhe zgjerim të hapësirave në kuptimin e ligjshmërisë së plotë, dominimin e ligjshmërisë edhe në këtë kësaj pjesë, gjë që do të konfirmoj se të gjithë kriminelët dhe kontrabandistët në këtë pjesë të Republikës së Kosovës i kanë ditët e numëruara në liri.
Edhe në Mitrovicë, duke u përgjigjur në një pyetje tjetër të gazetarëve, Kryeministri Thaçi i ka quajtur joreale dhe të pavërteta zërat se kinse Qeveria e Kosovës po bisedon fshehtas me Qeverinë e Serbisë për veriun e Kosovës.
Kryetari i komunës së Mitrovicës, Avni Kastrati, ju tha gazetarëve se e ka informua kryeministrin se deri tash në lagjen “Kroi i Vitakut” janë kthyer 20 familje shqiptare, që numërojnë përafërsisht 100 banorë dhe se në ndërtim janë 15 shtëpi të tjera, kurse pritet fillimi i ndërtimit edhe të 20 shtëpive të tjera.
Ndërkaq, ministri i Punëve të Brendshme, Bajram Rexhepi, ka thënë se qytetarët që do të kthehen në “Kroin e Vitakut” për të jetuar kanë siguri të plotë. Po absolutisht, banorët e pjesës veriore, jo vetëm të Mitrovicës, por në përgjithësi, janë të interesuar për rend, ligj dhe siguri. Jo vetëm shqiptarët, por edhe pjesëtarët e komunitetit serb dhe komuniteteve tjera janë të interesuar për rend dhe qetësi, prandaj policia e Kosovës me EULEX-in do të krijojnë një ambient sa më të qetë dhe të sigurt për të gjithë banorët”, ka thënë Rexhepi.
