2010/08/29 - 12:00
Kryetari Kastrati edhe me këtë rast ka falënderuar kryetarin e Inegolit, Alinur Aktash dhe biznesmenët nga ky rajon për interesimin që po tregojnë për Mitrovicën dhe qytetarët e komunës, duke u shprehur të jenë të gatshëm për të ndihmuar në realizimin e projekteve të ndryshme, të cilat do të definohen gjatë ditëve të ardhshme.
Mitrovicë, 29 gusht
Në vazhdën e takimeve me qëllim të thellimit të bashkëpunimit midis dy komunave të binjakëzuara, kryetari i komunës, Avni Kastrati edhe gjatë kësaj fundjave ka pritur një delegacion nga komuna Inegol e Turqisë, me në krye kryetarin, Alinur Aktash, në përbërje të të cilët ishte një numër biznesmenësh, shumica prej tyre me prejardhje shqiptare.
Kryetari Kastrati edhe me këtë rast ka falënderuar kryetarin e Inegolit, Alinur Aktash dhe biznesmenët nga ky rajon për interesimin që po tregojnë për Mitrovicën dhe qytetarët e komunës, duke u shprehur të jenë të gatshëm për të ndihmuar në realizimin e projekteve të ndryshme, të cilat do të definohen gjatë ditëve të ardhshme.
Ai ka thënë se jo vetëm komuna e Inegolit, por është edhe shteti i Turqisë ai që po e ndihmon Mitrovicën dhe Kosovën fuqishëm për të ecur përpara, ndërkohë që Kosova tashmë mund të thuhet lirisht se në shtetin turk ka gjetur partnerin strategjik për realizimin e projekteve të ndryshme kapitale zhvillimore, duke përkujtuar se tashmë në Kosovë kanë hyrë kompani të fuqishme turke që me sukses po e ndihmojnë zhvillimin e saj.
Kryetari i Inegolit, Alinur Aktash, duke shpreh falënderimet më të thella për mikpritjen që po ju bënë udhëheqja dhe qytetarët e komunës, tha se përveç thellimit të vëllazërimit midis dy qyteteve, dy popujve dhe shteteve, pra Turqisë dhe Kosovës, qëllimi i vizitës së tij në Mitrovicë, me biznesmen nga komuna që ai e drejton, është edhe identifikimi i fushave në të cilat Inegoli mund të ndihmoj Mitrovicën.
“Ne, në bashkëpunim me drejtuesit e komunës së Mitrovicës, jemi duke e realizuar projektin humanitar, përgatitjen e 500 iftareve për qytetarët mitrovicas gjatë gjithë Ramazanit, që e kanë bërë të mundur pikërisht biznesmenët e Inegolit, projekt të cilin vitin e ardhshëm do ta zgjerojmë, duke e shtuar numrin e iftareve në 750 apo 1.000. Por, ky, ndonëse është një projekt i rëndësishëm, nuk është i vetmi qëllim i yni. Sepse, ne synojmë që të ndihmojmë zhvillimin ekonomik të Mitrovicës, përmes projekteve të ndryshme, andaj duhet të përshpejtojmë hartimin e projekteve konkrete, për të filluar sa më parë realizimin e tyre”, tha Alinur Aktash.
Rrustem Musa, kryesues i Kuvendit të Komunës së Mitrovicës, e ka njoftuar Delegacionin nga Inegoli i Turqisë me mënyrën e funksionimit të Kuvendit të Komunës, strukturën e tij dhe vendimmarrjen në Kuvend.
Pas bisedës në ambientet e Kuvendit të Komunës, delegacioni i Inegolit, ka dalur deri në cepin verior të urës kryesore mbi Ibër, ku është njoftuar për ekzistimin e xhamisë aty deri në luftën e fundit dhe përpjekjet e pasuksesshme që po bëhen për rindërtimin e saj, për shkak të pengesave që po bëhen nga UNMIK-u.
Edhe me rastin e kësaj vizite, Delegacioni turk i prirë nga kryetari i komunës së Mitrovicës, Avni Kastrati, ka bërë iftar të shtunën në tendën e vendosur në sheshin në qendër të qytetit, ku janë takuar me qytetarë të shumtë. Të dielën delegacioni nga Inegoli ka vazhduar vizitat nëpër objekte të ndryshme historike dhe kulturore të Mitrovicës e rajonit.
