Me financim nga buxheti komunal, në vlerë prej rreth 10 mijë eurosh, kjo shkollë ka përfituar dy kabinete të reja, të pajisura me pajisjet më moderne, për lëndët kimi – biologji dhe fizikë. Ndërsa, ndihmë në sigurimin e mjeteve didaktike ka dhënë edhe MASHT-i.

Inaugurimin e këtyre dy kabineteve e ka bërë kryetari i komunës së Gjakovës Ardian Gjini, drejtoresha e drejtorisë për Arsim Eranda Kumnova – Baçi si dhe menaxhmenti, mësimdhënësit dhe nxënësit e kësaj shkolle.

Me këtë rast, kryetari Gjini ka thënë se komuna e Gjakovës në 4 vitet e kaluara ka qenë e fokusuar në përmirësimin e kushteve elementare nëpër shkolla, me theks të veçantë tek ngrohja dhe nyjat sanitare, ndërsa tash e tutje fokusi i investimeve do të jetë tek cilësia në mësimdhënie dhe mësimnxënie, duke siguruar sa më shumë kabinete dhe pajisje adekuate mësimore.